|
المشاهدات: 42 | التعليقات: 1
خلاص البيت بقه كوم تراب
كوم تراب
لانه كان من غير أساس
لان طوبه .. نصه نى ونصه شاب!
لأن البنّا كان غشيم
بقى كوم تراب
فمكنش لازم تيجى ريح
عشان فى يوم يصبح هدد
مش بالعدد ..
طوب الحيطان مش بالعدد
الحسبة ليها حسبة تانى
ومونة تانى .. وبنّا تانى
والاساس ..
كان فى الاساس عايز مدد
والمدد ..
حلم لسه مجاش أوانه
وهايجى يوم وهايتولد
ولاّ يمكن جه وفات
ولما ملقاش اللى يحلم
طق مات
****
ف الخلا..
أنا وأبويا والعيال والجيران
فارشين همومنا فى الخلا
وعلى الملا..
فاردين كفوفنا للسما
لحين تمطر بالحلول
لكن السما
بينها وبينا الف ميل
والخطوة فينا مقيدة
لكن القمر
واقف فى وشه الف ليل
والف ليلة مسوّدة
وحلمنا وف عز طلقه
والعنين مفروشة للى ها يتولد
وتقول خلاص..
بيجى الكابوس فوق الخلاص
ويفطسوا
وبعدما يطلّع لسانه للملا
بيقولنا : قولوا ولاّ اخرسوا
مفيش ميلاد
ومفيش ولد
****
خيال مقاته أبويا كان
مزروع بخوفه ف قلب ليل
والعتمة حالفة ميت يمين
ما تسيب فى راسه شعرة سودا
الكابوس فارد وعارف
حجم حلمه اللى اتوأد
البيت يابويا خلاص وقع
****
أنا والعيال
ماسكين فى طرف هدوم أبويا
وأمى بتنفخ فى الرماد
على وهم نار
على وهم نار تخبز عليها للعشا
طبلية جوّا أربع حيطان
وحكاوى عن شاطر حسن
وكلام تقولو بشوق لابويا
ساعة صفا..
بعد ما تنام العيال
مسكين يابويا
الوجع جوانا اكبر من ضلوعنا
ومن العديد ومن دموعنا
****
مرهم كلام الصبر نار
وجروحنا لسه مفتحة
ومقيحة
ماتقولش فيه بكره الشفا
لازم يابويا..
تعجن فى طينة شكل تانى
مش ها ينفع صبر تانى
وكوم وعود ملوش حدود
سيبك انت من الامانى
لازم يابويا..
تعجن فى طينة من تراب
مادستش فوقه خيل تتر
تراب يكون..
تراب يكون متين واصلب من الحجر
واعجن بدمى المونة
برضة مش مهم
افرد ضلوعى وعضمى كله فى الاساس
خلّيه يرّم
لكن المهم والأهم
البنّا مايكنش غشيم
البنّا
ما يكنش غشيم!
*****
اشرف محمد شلقامى
|
| 
11-23-2010, 08:06 PM
العرض العادي
المواضيع المتشابهه